Agron Malaj, ish-kryebashkiaku i Matit dhe tashmë kandidat i zgjedhur në Parlamentin e ardhshëm, figuron me dy dosje penale serioze që po hetohen aktualisht nga SPAK. Një nga këto çështje daton që prej vitit 1999, ku ai është dënuar nga Gjykata e Matit për armëmbajtje pa leje.
Sipas dokumenteve të siguruara nga CNA, në vitin 1999, Agron Malaj, asokohe 19 vjeç, së bashku me shtetasin E. D., u arrestuan pas një ngjarjeje të ndodhur në një lokal, ku pas një përplasjeje verbale, Malaj qëlloi me armë në drejtim të shtetasve B. B. dhe A. Gj., të cilët mbetën të plagosur.
Prokuroria në atë kohë kërkoi shpalljen fajtor të të dy të pandehurve vetëm për veprën penale të mbajtjes pa leje të armëve luftarake, duke kërkuar 10 muaj burg për Malajn dhe 4 muaj për E. D. Ndërkohë, për akuzën e plagosjes me dashje, prokuroria kërkoi shpalljen e tyre të pafajshëm, pasi i dëmtuari B. B. tërhoqi ankesën ndaj tyre.
Në vendimin e vitit 1999, Gjykata e Rrethit Gjyqësor Mat vendosi të shpallë fajtor Agron Malajn për armëmbajtje pa leje dhe ta dënojë me 10 muaj burg. Po ashtu, E. D. u dënua me 4 muaj burg për të njëjtën vepër penale.
Kjo nuk është e vetmja çështje që rëndon mbi figurën e Agron Malajt. Ai, së bashku me vëllanë e tij Fatos Malaj dhe shtetasin Elvin Tivari, dyshohet të jetë i përfshirë në disa vepra penale të tjera, për të cilat hetimet e SPAK vijojnë.
