Stadiumet dhe pallatet e sportit sezonin e ardhshëm do të jenë të hapur për tifozët spanjollë. Lajmin e ka bërë të ditur për mediat, ministrja e Shëndetësisë së Spanjës, Carolina Darias.
Duke folur zyrtarisht në një konferencë për shtyp, Darias u shpreh se gjithçka do të jetë njësoj si para pandemisë, duke nënkuptuar se stadiumet mund të jenë plot dhe tashmë, mund të shohim pamjen që deri para pak muajsh na dukej një iluzion i largët.
Eshtë ky një lajm i madh për tifozët spanjollë, që më në fund do kenë mundësinë të shohin ndeshje nga afër, por akoma më shumë për klubet, që gjatë pandemisë kanë pësuar humbje të mëdha financiare nga mungesa e tifozëve në stadiume.
Pas vendimit të Spanjës që të hapë stadiumet, pritet që dhe shtetet tjera të Europës të bëjnë të njëjtën gjë dhe futbolli t’i rikthehet sa më parë normalitetit. Lajmi për rikthimin e tifozëve është pritur mirë nga tifozët spanjollë, që shumë shpejt pritet t’i shikojmë në stadiume. Arenat si “Santiago Bernabeu” dhe “Camp Nou” do të duken edhe më të mrekullueshëm me atmosferën e krijuar nga tifozët.
Edhe në fusha të tjera përveç futbollit, duket se situata po rikthehet drejt normalitetit, me rastet gjithmonë e në rënie e me shifrat që po përmirësohen. Pas stadiumeve, priten që të merren edhe masa të tjera lehtësuese.
