Pasditen e sotme Ministrja e Energjisë dhe Infrastrukturës, Belinda Balluku ka thënë se nuk kishte vend për panik sa i përket situatës energjitike në vend.
Në mbledhjen e Komitetit të Energjisë, Balluku tha se prurjet në hidrocentralin e Fierzës, kishin qenë tepër të larta dhe se situata po mirëmenaxhohej, duke bërë që mos të ketë ndërprerje të energjisë apo rritje të çmimit.
Ministrja e Energjisë dhe Infrastrukturës, Belinda Balluku:
Ka pasur një përmirësim ditët e fundit. Ka patur një rritje të liqenit të Fierzës, duke qenë se ne kemi vendosur të mos prodhohet në Fierzë për disa kohë për të grumbulluar të gjitha ujërat, me shpresë që do të kemi edhe në ditët në vazhdim një prurje të re të motit të lagësht, shpresojmë të jemi në datën 7. Situata është e qetë e mirë menaxhuar.
Nuk ka vend për panik por ne duhet ta bënim këtë lloj mbledhje për transparencë. Sepse persona të cilët as nuk janë ekspertë kanë folur për “pikën e vdekjes” së Fierzës megjithëse siç e thanë edhe ekspertët që “nuk ka një pikë vdekje” për Fierzën.
Ne e kemi thënë se nuk do ketë rritje çmimesh dhe as ndërprerje energjie. Në maj do të kemi një tryezë me biznesin e madh për të parë se çfarë mund të bëhet për t’i mbrojtur këta të fundit.
