I pandehur në dosjen e njohur si “Plumbi i artë”, Petrit Qoli është marrë në pyetje nga prokurorët gjatë seancës gjyqësore lidhur me aktivitetet e tij ekonomike, pasuritë dhe raportet familjare, në kuadër të hetimeve për vrasjen e Fatmira Dedjas.
Gjatë dëshmisë, Qoli deklaroi se në periudhën 2002–2013 ka qenë kapiten anijesh peshkimi dhe pronar i disa mjeteve lundruese, konkretisht anijet “Dibra” dhe “Sazani”. Paralelisht, sipas tij, është angazhuar edhe në sektorin e ndërtimit, duke realizuar ndërtimin e rreth 8–9 pallateve dhe xhamisë në zonën e Rruzhbullit.
Ai sqaroi gjithashtu burimin e pasurisë së tij, marrëdhëniet me familjarët, aktivitetin e vëllait të tij Festim Qoli, si dhe mënyrën e administrimit dhe hipotekimit të pronave.
Në sallën e gjyqit, Qoli deklaroi:
“Qoli: Nga 2002 deri në 2013 kam patur anije peshkimi, kam punuar si kapiten anijeje. Anija Dibra dhe Sazani. Më vjen turp ta them por kam edhe fakultet juridik, te Kristali. Ndërkohë kam bërë dhe 9 pallate, jam marrë edhe me ndërtim.”
I pyetur nga prokurori Behar Dibra për mënyrën se si kishte hyrë në fushën e ndërtimit, Qoli u shpreh:
“Kam kushëri Mustafa Laçon. Është ndërtues, duhet të jetë 80 vjeç. I thashë kam 300 mijë marka. Ndërtimin e parë e kam bërë te gropa arkeologjike, mbrapa Pallatit të Kulturës.”
Lidhur me burimin e të ardhurave, ai tha se paratë i kishte siguruar nga peshkimi, ndërsa foli edhe për vëllain e tij Festim Qoli, duke përdorur tone të ashpra:
“Kam një vëlla që mos e paça, Festim Qoli. Edhe motër, Rezana Qoli.”
Në vijim të dëshmisë, Qoli deklaroi se Festim Qoli kishte disa biznese dhe se ishte marrë me tregti makinash të vjedhura ose të dubluara, duke shtuar se kishte pasur lidhje me shtetas italianë. Ai theksoi se nuk kishte bashkëpunuar kurrë në biznes me vëllain e tij, duke e cilësuar këtë të fundit si “fatkeqësi për familjen”.
Në lidhje me jetën personale të Festim Qolit, i pandehuri deklaroi se ky i fundit kishte lidhje me një shtetase bullgare shumë të pasur dhe se dispononte edhe pasaportë angleze. Ai shtoi se marrëdhëniet mes tyre kanë qenë të ftohta, duke i krahasuar me raportin “si Tomi me Jerry”.
Sa i përket çështjeve të pronësisë, Qoli deklaroi se të gjitha apartamentet i ka hipotekuar në emrin e tij dhe se çdo fazë ndërtimi është kryer nën mbikëqyrjen e tij direkte. “Nuk hidhej beton pa qenë unë aty. Unë jam autodidakt”, përfundoi ai në dëshminë e tij.
Seanca gjyqësore vijon me marrjen në pyetje të të pandehurve të tjerë dhe administrimin e provave në kuadër të dosjes “Plumbi i artë”.
