Qysh në fushatën për mandatin e parë, kryebashkiaku i Tiranës, Erion Veliaj, tundte kartën e studentit si një nga premtimet për të marrë votat e rinisë.
Edhe mandati i dytë i Veliajt në krye të bashkisë po mbaron, por karta e studentit mbeti thjesht një premtim për të marrë votat e studentëve. Jo vetëm kaq, por në emër të studentëve bëhen tenderë dhe abuzohet me fondet.
Para disa ditësh, Erjon Veliaj, përmes Agjencisë së Rinisë në Bashkinë Tiranë, ka bërë “gol” me një tender për faqen e kartës së identitetit të studentëve. “Blerje shërbimi për mirëmbajtjen e objekteve specifike ËEB, Aplikacioni, Platforma e Kartës së Studentit, si dhe shërbimi i hostimit të tyre”, kështu emërtohet tenderi, ku klienti i Velisë e fiton tenderin pa preventiv. Gazeta Reforma disponon dokumentin ku duket qartë se preventivi i shërbimeve shfaqet bosh, pa të dhëna në faqen zyrtare.
Tenderi me fondin limit 5 760 000,00 lekë u zhvillua më 18 shtator dhe dhe fituesi u shpall më 5 tetor 2020. Operator Ekonomik Kontraktues është “ÇELËSI” shpk me ofertën fituese 5.500.000 pa TVSH. Nuk po i hyjmë këtu kompetencës së operatorit në fushën e teknologjisë, që i mungon, por vërehet se tenderi është shënuar me flamur të kuq nga Open Data Albania. Kjo do të thotë se tenderi është manipuluar dhe ka mundësi abuzimi nga autoritetet.
Këto para jepen që të mirëmbahet faqja, e cila është ngritur tashmë dhe funksionon.
Operatori tjetër “Kreatx” shpk, u skualifikua për arsye se nuk ka paraqitur deklaratën për përmbushjen e specifikimeve teknike duke rënë në kundërshtim me pikën 2.1 gërma (ç) e kritereve të veçanta për kualifikim pjesë përbërëse e dokumenteve standarde të tenderit.
Skualifikim i të gjithë operatoreve konkurrues përveç fituesit, është një arsye që të dyshohet se tenderi është manipuluar, sepse gara nuk ka kuptim me një kompani.
/GazetaReforma.com/
