Kryetari i Bashkisë së Tiranës, Erion Veliaj priti në sallën e Këshillit Bashkiak një grup studentësh nga universitete të ndryshme të kryeqytetit. Në bashkëbisedimin e kryer me ta Veliaj shkëmbeu ide dhe projekte për rininë. Një ndër propozimt e bëra nga të rinjtë ishte që të krijoheshin sa më shumë hapsira për të rinjtë që kanë pasion teknologjinë, e cila është e ardhmja. Ndër të tjera Veliaj ka folur edhe për kartën e studentit.
“Projektin pilot të TUMO-s që kemi nisur tek “Air Albania”, do ta çojmë në nivel makro te “Piramida”, ku shkojmë nga 500 nxënës që mësojnë teknologji informacioni, në 5000 nxënës. Por ideja është që ta bëjmë këtë në çdo qytet. Në Tiranë kemi bërë 8 biblioteka të reja, sigurisht që ka nevojë për më shumë, por e gjetëm me zero. Tjetër fushë ku avancuam shumë është Karta e Studentit, si pjesë e Paktit me Universitetin. Aty kemi kaluar mbi 1050 shërbime. Duhet ta kishte bërë administrata e kaluar, por nuk e bëri”, vijoi ai.
Ndërsa, një lajm i mirë për të gjithë studentët, është edhe fakti që në Bashkinë e Tiranës zhvillohen praktika kundrejt një pagese për të rinjtë, duke i motivuar ata.
“Në Bashkinë e Tiranës i kemi praktikat të paguara. Për 1 mijë studentë japim mundësinë që të ndërtojnë CV-në e tyre, për të shpangur atë pyetjen: ‘Ku ke punuar më përpara?’. Pra, kjo mundësi ndihmon studentët që kur të kërkojnë punë të mos e fillojnë nga zero”, shtoi Veliaj.
“Një nga gjërat që duam të bëjmë më mirë është të rrisim fondet për grante për start up-et rinore. Mjafton të kesh një ide të mirë dhe merr grantin, të cilin s’ke nevojë ta kthesh”. Ky është një tjetër projekt i Bashkisë së Tiranës për të ndihmuar studentët që të integrohen sa më lehtë në jetë, pasi të dalin nga bankat e shkollës.
Ndër të tjera, kreu i Bashkisë foli edhe për konviktet, që po rindërtohen nga e para, me cilësi më të mirë dhe me kushte më moderne. Veliaj shkëmbeu ide edhe për vitin e ardhshëm, ku Tirana do të jetë “Kryeqyteti Europian i Rinisë”. Ai inkurajoi të rinjtë që t’i kushtojnë një vëmendje të veçanë sepse do ketë turistë nga e gjithë bota dhe plot aktivitete për rininë.
