Kryebashkiaku i Tiranës, Erion Veliaj, ka kërkuar të lirohet nga burgu, pas dy muajsh në arrest. Ai ka depozituar një kërkesë për revokim ose zëvendësim të masës së sigurisë, si dhe informacion dy mujor nga SPAK mbi ecurinë e hetimeve për korrupsion dhe pastrim parash, që po zhvillohen ndaj tij.
Kërkesa do të shqyrtohet të mërkurën nga gjyqtari i hetimit paraprak, Erjon Bani – i njëjti që firmosi masën e arrestit më 12 shkurt.
Veliaj kishte apeluar më herët vendimin e GJKKO-së në Apelin e Posaçëm, por kjo gjykatë la në fuqi masën e arrestit, duke rrëzuar kërkesën e tij.
Veliaj u arrestua më 10 shkurt me urdhër të SPAK, nën akuzat për shpërdorim detyre, korrupsion, mosdeklarim të pasurisë dhe pastrim parash. Ai ka mohuar akuzat, duke i cilësuar të pabazuara dhe me motive politike.
Në vendimin e zbardhur së fundmi, gjyqtari Engert Pëllumbi argumenton se Veliaj, së bashku me Arjola Xoxën dhe biznesmenin Elman Abule, kanë vepruar si pjesë e një grupi të strukturuar kriminal.
Ndërkohë, për të njëjtën dosje, Abule ndodhet në arrest shtëpie, bashkëshortja e Veliajt dhe pesë biznesmenë të tjerë janë me masën “detyrim paraqitje”. Mbrojtja ligjore e Veliajt pritet të çojë çështjen në Gjykatën e Lartë.
