Nëse është menduar se çështja e Teatrit Kombëtar është mbyllur kjo nuk është e vërtetë, vazhdon të jetë aty, si mendim i padiskutuar.
Mbrëmjen e sotme, i ftuar në “Opinion” kryetari i Bashkisë së Tiranës, Erion Veliaj, ka thënë se Tirana do ta ketë teatrin e saj të ri dhe modern, pasi kemi nevojë për një godinë të re e cila plotëson standardet.
Madje Veliaj sfidon opozitën duke iu drejtuar dhe duke i thënë se nëse ka një mendim alternativ atëherë të vijë në 30 qershor dhe ta tregojë.
Pra e thënë me fjalë të thjeshta, Veliaj ka thënë se 30 qershori do të shërbejë edhe si “referendum”, ku qytetarët do të vendosin e duan apo jo teatrin e ri, apo të mbajnë ngrehinën që është tani.
Pjesë nga biseda
Veliaj: Javën tjetër do të kemi një Vendim të Këshillit të Ministrave, ku kryetari i Bashkisë drejton garën për teatrin. Do të lihet gara për 40 ditë, më pas apelimi ka kohë 30 ditë dhe pastaj do të ndërtohet teatri. Ne reflektuam, edhe pse kishim shumicën. Unë nuk flas për prishje, do të ndërtohet teatri i ri. Ky teatër u bë ambient provizor për shtatë vite, që ishte kinema për ushtarët e kazermës, nuk do të jetë më. Me atë kapacitet, nuk na vlen sot. Së pari, të pyesësh artistët ndërrohen në korridor. Projekti është i papërfunduar.
Fevziu: Po pse nuk e ruani këtë projekt. Urdhëro, i ka të gjitha në projekt, sallë mbledhjesh, bibliotekë, restorant, ka edhe një pishinë. Po them se nuk mban si ju, ndërtoje nga fillimi siç ishte.
Veliaj: Një ndërtesë tallashi e ndërtuar për shtatë vjet, ia bëmë për 70 vjet respektin. Sot ka nevojë për një skenë ku të shkojë poshtë, ka nevojë për një garderobë.
Fevziu: Pse nuk ndërtoni teatër të ri te Bulevardi i Ri?
Veliaj: Bulevardi i Ri është për të ardhmen e Tiranës. Sot qendra është ajo pjesë, ndoshta më vonë do të kemi edhe te Bulevardi i Ri. Por të paktën opozita të vijë më 30 qershor, e ta shohim sa duan tallashin e sa duan këtë.
Fevziu: Pse nuk bëni një sondazh, referendum?
Veliaj: Më 30 qershor…
Fevziu: Po zgjedhjet nuk janë vetëm për teatrin.
