Mediat në Kosovë kanë njoftuar se ka ndërruar jetë prokurori i Prokurorisë Speciale, Enver Krasniqi. Thuhet se Krasniqi u nda nga jeta rreth një orë më parë.
Lajmin për vdekjen e prokurorit e ka konfirmuar Blerim Isufaj, kryeprokuror i Prokurorisë Speciale. Sipas tij, bëhet fjalë për natyrale. Ndërkohë kujtojmë se prokurori Enver Krasniqi ishte duke hetuar rastin e vjedhjes së 2.1 milionë eurove nga Thesari i shtetit në Kosovë. Vjedhja e 2,1 milionë eurove ka ndodhur më 21 tetor 2020.Ditë më parë, Prokuroria Speciale njoftoi se janë bllokuar 600 mijë euro të vjedhura dhe se dy persona të dyshuar janë në paraburgim, ndërkohë që janë ngrirë 34 llogari bankare.
Lajmi është bërë i ditur, përmes një komunikimi për mediat të prokurorisë, ku gjithashtu është treguar se janë bllokuar 34 llogari bankare të bizneseve në të cilat janë transferuar parat nga i dyshuari Kadri Shala pronar i (LDA Group Sh.p,k). Ndërkohë është bërë kërkesa te autoritetet e Turqisë, lidhur me transferimin prej 440 mijë eurove.
“Deri më tani lidhur me këtë rast janë arrestuar dy (2) persona të cilët gjenden në paraburgim për veprat penale ‘Keqpërdorim i detyrës zyrtare dhe autorizimit’ nga neni 414 paragrafi 2 dhe 3 pika 3.4 në lidhje me paragrafin 1 të KPRK-ës dhe ‘Shpëlarja e parave’ nga neni 302 të KPRK-së, lidhur me veprën penale ‘Pastrimi i parave’ nga neni 56 i Ligjit nr. 05/L-096 për parandalimin e pastrimit të parave dhe luftimin e financimit të terrorizmit”, thuhet në komunikatën për medie.
