Mbrëmjen e djeshme ndërroi jetë elektriçisti Agron Manaj, pasi ra në kontakt me energjinë elektrike.
Ndërkohë ditën e sotme drejtuesi i punimeve të OSHH në Memaliaj është arrestuar nga policia pasi akuzohet se ka shkelur rregullat e mbrojtjes në punë. Ditën e djeshme, ndërroi jetë elektriçisti Agron Manaj, i cili humbi jetën pasi ra në kontakt me energjinë elektrike.
Manaj, 54 vjeç, bashkë me kolegun e tij 55-vjeçar po punonin në një shtyllë tensioni për të riparuar linjën elektrike në fshatin Çërrilë në Memaliaj. Ata ranë në kontakt me rrymën elektrike duke mbetur të plagosur. Manaj u dërgua në spital në gjendje të rëndë, por nuk mundi të mbijetonte, ndërsa kolegu i tij 55 vjeç mbeti i plagosur lehtë.
NJOFTIMI I POLICISË:
Arrestohet në flagrancë drejtuesi i punimeve të OSSH Memaliaj, për veprën penale “Shkelja e rregullave të mbrojtjes në punë”. Shërbimet e Komisariatit të Policisë Tepelenë arrestuan në flagrancë për veprën penale “Shkelja e rregullave të mbrojtjes në punë”, shtetasin A. Zh., 51 vjeç, banues në Memaliaj, me detyrë drejtues i punimeve të grupit të OSSH Memaliaj, pasi ditën e djeshme, gjatë riparimit të linjës elektrike në fshatin Çërrilë, Memaliaj, dyshohet se për shkak të moskryerjes së kontrollit dhe mungesës së monitorimit në punën e elektricistëve, janë dëmtuar dy elektricistë, shtetasit A. H. dhe A. M. Ky i fundit ka ndërruar jetë pas disa orësh, në Spitalin e Traumës në Tiranë. Materialet i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme.
