Minatori 61-vjeçar i cili po bënte 5 ditë i bllokuar në thellësinë e galerisë në Zonën e Parë të minierës së Bulqizës, është gjetur i pajetë ditën e sotme.
Trupi i tij u gjet i pajetë nga kolegët e tij të cilët kanë kërkuar pa ndërprerë. Mësohet se policia e Bulqizës ka ndaluar inxhinierin e Galerisë dhe përgjegjësin e punimeve, ndërkohë vijojnë hetimet për të zbardhur shkakun e shembjes së galerisë.
Kujtojmë se ngjarja ndodhi ditën e mërkurë, në datën 15 shtator, në galerinë e kompanisë së quajtur “Kaduretex Sh.p.k”, që operon në zonën e parë krom-mbajtëse të Bulqizës, ku 61-vjeçari mbeti i bllokuar në minierë pas shembjes së një masivi shkëmbor.
Kjo është hera e parë që në galerinë e Bulqizës, që procesi për nxjerrjen trupin e pajetë të minatorit të zgjaste kaq shumë.
Ndërkohë që ditën e sotme kanë dalë detaje të reja në lidhje me këtë ngjarje të rëndë. Minatori Muharrem Plaku, 61-vjeç ngeli i bllokuar në galeri në zonën D, rreth 450 metra thellësi. Mësohet se minatori në momentin e shembjes është futur në një boshllëk katror të ndërtuar prej druri, i cili është vendosur për rastet e rrezikut, por ka qenë e pamundur që ky vend të mbroj jetën e tij, pasi sasia e shkëmbinjve të shembur ka qenë e madhe dhe i ka shkaktuar vdekjen e menjëhershme.
