Tragjedia e 7 gushtit në minierën e kromit të kompanisë “GERTI Sh.p.k.” në Bulqizë ka rikthyer në qendër të vëmendjes mungesën e kushteve të sigurisë në industrinë minerare shqiptare.
Minatori 66-vjeçar, Fari Veliu, humbi jetën brenda galerisë pasi u godit nga një masiv mineral gjatë punës. Ai ishte një punëtor me përvojë prej vitesh në të njëjtën kompani, ku, sipas banorëve, edhe më herët janë shënuar aksidente të ngjashme fatale.
Aksidenti shkaktoi reagime të forta për shkak se, edhe pse ligji parashikon masa strikte sigurie, në terren ato shpesh injorohen.
Menjëherë pas ngjarjes, Policia e Dibrës arrestoi pesë pjesëtarë të stafit teknik të kompanisë, duke i akuzuar për “shkelje të rregullave të mbrojtjes në punë”. Por vendimi i Gjykatës së Dibrës për t’i zbutur masat, ka lënë dy në hetim të lirë dhe dy në “arrest shtëpie”.
Për të pestin e arrestuar, Njazi Përkola, ende nuk është zhvilluar seanca e masës së sigurisë, ndërsa gjyqi është zhvilluar me dyer të mbyllura.
Në qendër të polemikës qëndron fakti se pronari i kompanisë, Jeton Dani, nuk është thirrur as për marrje në pyetje, pavarësisht se ligjërisht subjekti ka përgjegjësinë kryesore për sigurinë e punëtorëve.
Lidhja familjare e Danit me Murat Danin, ish-kandidat për deputet i Partisë Socialiste në Dibër, ka shtuar dyshimet për një mbrojtje politike dhe ndikim të heshtur institucional.
Deri më tani, asnjë deklaratë zyrtare nuk është dhënë as nga autoritetet, as nga pronari për këtë ngjarje tragjike.
