Në Tiranë, tragjedia që çoi në vdekjen e një fëmije 3-vjeçar, Brian Spahiu, pas një ndërhyrjeje dentare në një klinikë private, ka nxitur Prokurorinë të kërkojë një hetim të thelluar për të përcaktuar shkaqet e vdekjes së tij. Vogëlushi kreu ndërhyrjen në fund të muajit shtator të vitit 2023 në klinikën e mjekut Roland Xhaxho dhe ndërroi jetë më 1 tetor të po atij viti.
Sipas Prokurorisë së Tiranës, ekzaminimi i parë mjekoligjor u konsiderua i paplotë dhe jo i saktë. Rezultati i atij ekzpertimi tregoi se vdekja e të miturit erdhi si rezultat i një mbidoze të narkozës. Megjithatë, për shkak të pasigurive në lidhje me konkluzionet e ekspertizës dhe mungesës së ekspertëve vendas që mund të adresonin çdo aspekt të rastit, Prokuroria vendosi të kërkonte një akt tjetër ekspertimi nga jashtë vendit.
Për këtë qëllim, një grup mjekësh italianë është ftuar të kryejnë një akt-ekspertizë të re mjekoligjore. Këta ekspertë do të analizojnë me kujdes të gjitha të dhënat dhe rrethanat që çuan në vdekjen e Brianit për të përcaktuar nëse ka pasur neglizhencë mjekësore, probleme me dozimin e anestezisë, apo çështje të tjera të fshehura që mund të kenë kontribuar në këtë ngjarje tragjike. Ky hapi është i rëndësishëm për të siguruar që të gjitha pyetjet lidhur me këtë rast të marrin përgjigje të plota dhe të drejta, duke sjellë drejtësi për familjen e vogëlushit dhe përgjegjësi për çdo neglizhencë të mundshme.
