Sot është përcjellë për në banesën e fundit 12-vjeçari që humbi jetën papritur në spitalin e Traumës në Tiranë.
I mituri ishte paraqitur në spital rreth 10 ditë më parë me simptoma gripi dhe kishte dalë më 31 dhjetor, pasi gjendja e tij ishte përmirësuar. Pas disa ditësh, ai u rikthye në spital për shkak të të vjellave dhe aty u diagnostikua me glicemi të lartë.
Dy ditë më parë, ai ishte dërguar nga urgjenca e Korçës në Tiranë për mjekim të specializuar, por gjatë rrugës ka pësuar arrest kardiak dhe ka humbur jetën.
Për shkak të moshës dhe vdekjes së papritur, policia ka nisur hetime për zbardhjen e shkaqeve të vdekjes.
Familjarët e të miturit kanë shpjeguar për mediat se djali ishte i shëndetshëm dhe nuk kishte pasur probleme shëndetësore më parë. Ata kanë theksuar se në spitalin e Korçës nuk ishte trajtuar siç duhej, duke u ankuar për mungesë reagimi ndaj simptomave të tij.
QSUT ka reaguar duke njoftuar se i mituri ka qenë i diagnostikuar me miokardit akut, një sëmundje e rrallë dhe e rrezikshme që shkakton një shkallë të lartë vdekshmërie.
Njoftimi:
QSUT i shpreh ngushëllimet më të thella familjes së 12-vjeçarit L.S në këtë moment të vështirë. Nisur nga interesi i publikut për rastin tragjik të ndarjes nga jeta të 12-vjeçarit, informojmë se pacienti L.S. është hospitalizuar në Spitalin Pediatrik të QSUT më datë 7 janar 2024 dhe ka ndërruar jetë më datë 8 janar 2025, në orën 01:45, në Shërbimin e Terapisë Intensive Pediatrike.
Pas ekzaminimeve të kryera, pacienti është diagnostikuar me miokardit akut, një sëmundje e rrallë dhe e rrezikshme, e cila shoqërohet me shkallë të lartë të vdekshmërisë. Pavarësisht kujdesit maksimal dhe trajtimeve të kryera sipas protokolleve mjekësore, ndarja nga jeta e pacientit ka qenë e pamundur të parandalohet. Duke mirëkuptuar dhimbjen e familjes dhe interesin e publikut, QSUT riafirmon përkushtimin për transparencë dhe për ofrimin e trajtimeve më të mira për çdo pacient.
