Mbrëmjen e sotme është vrarë me armë zjarri një person në qytetin e Shkodrës. Mësohet se bëhet fjalë për Lulash Qepuri, banues në fshatin “Hot i Ri”, Komuna Rrethina. Forca të shumta policie kanë rrethuar menjëherë pas ngjarjes zonën e Stomgolemit në Shkodër, ku u ekzekutua 74-vjeçari me armë zjarri, të dyshuar pistoletë. Mësohet se autorët kanë qëlluar nga brenda makinës viktimën. Gjithashtu bëhet me dije se një armë zjarri shotgun është gjetur në vendin e ngjarjes.
Viktima rezulton emër i njohur për policinë shqiptare. Sipas BallkanWeb në tetor 2011 Qepuri u arrestua nga policia pasi gjatë kontrollit të ushtruar nga shërbimet policore në lokalin dhe në banesën e tij ngjitur me lokalin, janë gjetur dhe sekuestruar armë zjarri, municione luftarake si dhe fara të bimës narkotike kanabis sativa. Policia ka sekuestruar 1 armë zjarri Automatik mod.56, 1 armë zjarri tip Revolver shtatëshe, 262 copë fishekë të modeleve të ndryshme, fitila zjarr përcjellës, 111 copë kapsolla detonatorë, si dhe një qese prej 55 gram me fara të bimëve narkotike kanabis sativa. Në lidhje me këtë ngjarje u kryen të gjitha veprimet e nevojshme hetimore e procedurale dhe materialet në ngarkim të shtetasit Lulash Qepuri, i kaluan për ndjekje të mëtejshme Prokurorisë së Rrethit Gjyqësor Shkodër, për veprat penale të “Mbajtjes pa leje të armëve dhe municioneve luftarake” dhe “Mbajtja të lëndëve narkotike”.
