Ministri i Mbrojtjes, Niko Peleshi ka bërë me dije se lufta me flakët në vend është duke vazhduar. Në një postim në Facebook, peleshi shkruan se Forcat e Armatosura dhe strukturat e tjera të Mbrojtjes civile, nën koordinimin e AKMC janë duke punuar për shuarjen e zjarreve nga ajri e nga toka në disa vende, siç është karaburuni, Thira në Lezhë e vermoshi në Malësin e Madhe. Peleshi bën me dije se në të gjithë territorin në këtë moment nuk kërcënohen jetët e njerëzve dhe banesat.
“Vazhdon lufta me flakët – Në këto momente Forcat e Armatosura dhe strukturat e tjera të Mbrojtjes civile, nën koordinimin e AKMC janë duke punuar nga toka e ajri për izolimin dhe neutralizimin e flakëve në Karaburun, Rips (Vlorë), Gadurove-Selite (Mallakastër), Thirë (Lezhë), Margegaj, Theth (Tropojë), Vërmosh (Malësi e Madhe). Në të gjithë territorin në këtë moment nuk ka kërcënime në jetë dhe në banesa”, shkruan Peleshi.
Më herët Ministria e Mbrojtjes bëri me dije se në 11 ditët e fundit janë shuar 163 vatra zjarri, ndërsa flakët janë neutralizuar edhe në disa zona të Gjirokastrës ku situata ka qenë për disa ditë kritike dhe në fshatin “Asim Zeneli” humbi jetën një 64-vjeçar dhe mbeti e dëmtuar nga flakët edhe bashkëshortja e të ndjerit.
