Vazhdon historia e “Bana King”! Ditën e djeshme u arrestuan 20 punonjës policie në portin e Durrësit pasi një kontejner i mbushur me banane ishte hapur dhe ishin zhdukur 49 arka, të dyshuara me drogë.
Ajo çka mbetet e dyshimtë është fakti se pse mbahet e fshehtë se cilës kompani i përket kontejneri me banane. A vazhdon tashmë “Bana King” në një mënyrë më të moderuar duke mos dalë ‘sheshit’ si herën e parë?
Autoritetet zbuluan se kontejneri nuk kishte vulën e sigurisë të plumbosur kur ishte shkarkuar, ndërkohë që vula i është vënë nga autoritetet e portit, duke ngritur dyshime për një rrjet të mirëorganizuar trafiku që favorizohet nga strukturat portuale.
Edhe pse kanë kaluar 2 ditë nga zhdukja e 49 arkave me kokainë, Policia e Shtetit dhe Prokuroria, nuk publikojnë emrin e kompanisë, së cilës i përket ngarkesa e ardhur nga Ekuadori. Por dhe pse vazhdon të mbahet e fshehtë nga autoritetet kompania së cilës i përket, kontejneri është “Zico Sh.p.k”, e biznesmenit të bananeve “Bana King”, Trifon Murataj.
Nga verifikimet rezultoi se mungonin 49 arka me banane dhe dyshimet janë se në to ka pasur kokainë. Trafiku i kokainës përmes bananeve është rritur ndjeshëm kohët e fundit dhe dyshohet se e njëjta gjë ka ndodhur me kontejnerin e “Bana King”.
Në një vend normal e me qeveri përgjegjëse për trafikun e kokainës biznesmeni Trifon Murataj do të ishte vendosur pas hekurave por kur nuk kaloi asgjë herën e kaluar që doli komplet zbuluar me trafikimin e kokainës nëpërmjet “Bana King” nuk mendohet se do ta gjejë gjë këtë herë që mungojnë 49 arka me banane që edhe pse është supozim dihet më së miri që kanë qenë me drogë.
Dyshohet se hapja e kontejnerit ka ndodhur gjatë natës, ndaj janë arrestuar të gjithë punonjësit e turnit të dytë, ndërkohë mungesa e punëtorëve të terminalit ka ndikuar dhe në përpunimin e anijeve me kontejnerë.
Burimet bëjnë me dije se kontejneri ka mbërritur nga Ekuadori dhe me t’u shkarkuar nga anija, u depozitua në zonën e sheshit portual, ku ndodhen edhe shumë kontejnerë të tjerë në pritje të firmave përkatëse për të kryer procesin e zhdoganimit. Pra të gjithë punonjësit e portit duket se janë të përfshirë.
Gazeta Reforma është munduar të marrë më shumë informacione e të dhëna nga instancat shtetërore duke i shkruar si Interpolit dhe policisë në Ekuador, po gjithashtu duke i bërë thirrje edhe ministrit të brendshëm, Bledi Çuçi, si dhe drejtorit të policisë, Gledis Nano nga të cilët nuk ka asnjë reagim për skandalet që përfshihet “Bana King”. Gjithashtu dhe në këtë rast nuk ka ende asnjë reagim nga Nano për emrin e firmës duke e treguar se nuk do ta përmendë atë emër që tashmë është përfshirë jo vetëm në këtë po në shumë skandale të përsëritshme siç ishte herën e fundit me 119 kg kokainë në kontejnerin e “Bana King”.
Është bërë pothuajse normale tashmë të dalin në ‘shesh’ të gjitha trafiqet dhe manipulimet e tyre pasi kompania e Trifon Muratajt është bërë eksperte e sjelljes së kokainës nga Ekuadori, se normale ka arritur të blejë të gjithë strukturat shtetërore. Kjo mungesë që ndodhi në rastin e Durrësit e tregon qartë se si u ble gjithë administrata që kontejneri të shkarkohej para kohe.
Vërtetohet mirë lidhja që ka Trifon Murataj me të gjitha strukturat shtetërore pasi me ndërhyrjet e tij arriti të nxjerrë nga burgu nipin e tij Marson Murataj i cili u prangos më 31 dhjetor 2021, për 119 kilogramë kokainë të gjetur brenda magazinës në Vaqarr. Kujtojmë se në dhjetor të vitit të kaluar në kontejnerin e “Bana King”, autorët morën një pjesë të kokainës por nuk arritën ta transportojnë të gjithën duke lënë pas 7 arka me 119 kilogramë kokainë.
Për mos të rënë në sy më 2 janar 2022, Gjykata e Shkallës së Parë Tiranë e la në burg pa afat Marson Muratajn, por normalisht milionat e hedhura nga ‘bosi’ i “Bana- King”, bëri që po kjo gjykatë, më 4 shkurt 2022, ta kalonte në “Arrest shtëpie”, duke pretenduar se nuk ka lidhje me kokainën e kapur.
