Ministri i Mbrojtjes, Niko Peleshi ka reaguar në lidhje me situatën e vatrave aktive të zjarrit në vend, të cilat kanë përfshirë zona të ndryshme duke djegur disa ha pyje nga Jugu në Veri.
Me anë të një postimi në rrjetet sociale, Peleshi ka treguar se në vendin tonë janë ende pesë vatra zjarri aktive, ku më kritiket mbeten ato të Karaburunit dhe të Kurbinit. Peleshi ka shkruar se strukturat e mbrojtjes civile ndodhen në terrenë dhe po përpiqen të shuajnë vatrat e zjarrit.
Më tej Peleshi ka shtuar se koordinimi dhe ndërhyrja e menjëhershme e strukturave të emergjencave civile, ka bërë që vatrat të neutralizohen menjëherë, pa u cënuar pasuritë natyrore apo zonat e banuara.
“Aktualisht strukturat e mbrojtjes civile janë duke u përballur me flakët në 5 vatra zjarri, ku më kritiket ngelen ato të Karaburunit dhe Kurbinit.
Ndërkohë gjatë ditës së sotme në Qëndrën e Emergjencave Civile janë lajmëruar me dhjetra vatra.
Koordinimi dhe ndërhyrja e menjëhershme e strukturave të emergjencave civile në nivel vendor dhe qendror ka bërë të mundur neutralizimin e tyre pa cënuar pasuritë natyrore apo zona të banuara.
Bashkëpunimi me komunitetin për parandalimin apo lajmërimin e hershëm të situatave të zjarreve është jetik për të limituar pasojat e temperaturave të larta të këyre ditëve”, shkruan ministri i Mbrojtjes, Niko Peleshi.
