Zjarri që shpërtheu rreth dy javë më parë pranë liqenit të Luleve në Parkun Kombëtar të Lurës vijon të përhapet me intensitet, duke marrë përmasa shqetësuese.
Flakët janë përhapur në një zonë të gjerë dhe tashmë kanë avancuar deri në territorin e Zall Gjoçajt, duke shkrumbuar dhjetëra hektarë me pisha të zeza, ah dhe bimësi të dendur malore.
Megjithëse në terren po punojnë dhjetëra efektivë të ADZM Dibër, zjarrfikës të Bashkisë Dibër, punonjës të shërbimit pyjor, forca të ushtrisë dhe banorë të zonës, zjarri nuk është vënë ende nën kontroll.
Terreni i thepisur malor dhe era e fortë kanë vështirësuar maksimalisht operacionet tokësore për shuarjen e flakëve.
Zjarri tashmë rrezikon seriozisht stanet e verimit, bagëtitë, si dhe mbi 100 koshere bletësh që ndodhen në zonën e Zall Gjoçajt. Për këtë arsye, autoritetet vendore kërkojnë ndërhyrje urgjente nga ajri, duke theksuar se në këto kushte është e pamundur të frenohet zjarri vetëm nga toka.
Duke qenë se zjarri po i afrohet edhe liqeneve të Lurës dhe është pranë zonës së liqeneve të malit të Balgjajt, një ndërhyrje ajrore me helikopter mund të jetë jetike për të shmangur një katastrofë të madhe mjedisore dhe ekonomike në këtë park kombëtar me rëndësi të veçantë natyrore.
