Ditën e sotme, Ministria e Shëndetësisë njoftoi se janë identifikuar 15 raste të reja me Covid-19 në 24 orët e fundit, 13 prej të cilëve në Durrës, por pa dhënë detaje rreth tyre.
Ditët e fundit Durrësi është kthyer në një vatër të nxehtë të koronavirusit, pasi numri më i madh i rasteve të reja që janë raportuar vijnë pikërisht nga ky qytet.
Shkak është bërë një fasoneri, e cila kishte një filial edhe në Krujë, prej ku mendohet të jetë marrë virusi dhe të jetë shpërndarë më pas edhe në qytetin bregdetar.
Me këto raste, qyteti bregdetar është kthyer në “vatrën” e dytë më të rrezikshme të koronavirusit, pas Tiranës, me më shumë raste aktive.
Në total janë 175 raste aktive, nga të cilat 57 në Tiranë dhe 44 në Durrës.
Në këto kushte, nëse numri vijon të jetë në rritje, qyteti i Durrësit rrezikon t’i kthehet izolimit total.
