Deputeti Petrit Vasili kritikoi ashpër qeverinë Rama gjatë fjalës së tij në Kuvend, duke deklaruar se pushteti lokal është shndërruar në një fantazmë të plaçkitur totalisht nga qeveria. Sipas Vasilit, qeveria ka rrëmbyer të gjitha kompetencat e pushtetit lokal në mënyrë mafioze, duke përfshirë edhe lejet e ndërtimit, të cilat tashmë do të jepen vetëm nga qeveria qendrore.
“VKM më e fundit e Ramës i merr edhe lejet e ndërtimit pushtetit lokal, në mënyrë që të rrëmbejë çdo frut, dardhë e kumbull të korrupsionit vetëm në duart e saj dhe të Ramës,” tha Vasili. Ai shtoi se qeveria ka falimentuar financiarisht pushtetin lokal, duke lënë dhjetëra bashki me borxhe të mëdha. Vasili akuzoi qeverinë për mbushjen e bashkive me kryetarë të korruptuar dhe me rekorde kriminale, si dhe për shumëfishimin e të punësuarve për qëllime elektorale.
Vasili kritikoi gjithashtu reformën e vitit 2015 për pushtetin vendor dhe ndarjen e re administrative, duke e cilësuar atë si një dështim total. “Pushteti lokal është një fantazmë në frymën e fundit, e mbushur me patronazhistë që vegjetojnë dhe përdoren për fushata zgjedhore si kamikazë të fëlliqura,” tha ai. Deputeti theksoi se qeveria ka bërë gjithçka për të shkatërruar autonominë e pushtetit lokal dhe për të marrë kontrollin e plotë të fondeve dhe projekteve, duke lënë pushtetin lokal pa kompetenca reale për të administruar sektorë të rëndësishëm si turizmi.
