Varianti “indian” i Covid-19, i njohur shkencërisht si varianti Delta, ka mbërritur tashmë në Maqedoninë e Veriut. Lajmin e ka konfirmuar edhe ministri i Shëndetësisë, Venko Filipçe. Ai ka thënë se sipas anketës epidemiologjike që ka bërë spitali, pacienti është kthyer nga Iraku, ku ka qenë në spital 10 ditë më parë. Pacienti i infektuar është në gjendje të qëndrueshme dhe nuk është në rrezik për jetën.
“Sipas anketës epidemiologjike të cilën e ka bërë spitali, pacienti është kthyer nga Iraku, ku më parë 10 ditë ka qenë i hospitalizuar, kur është kthyer në vendin, menjëherë me makinë të ndihmës së shpejtë është dërguar në spital. Gjendja e pacientit është stabile dhe nuk është shenjë për rrezik”, ka thënë Ministri i Shëndetësisë i Maqedonisë së Veriut, Venko Filipçe.
Kujtojmë që varianti Delta u shfaq për herë të parë në Indi dhe është disa herë më shumë ngjitës se varianti i parë i virusit. Ndërsa në Indi ka qenë përgjegjës për numrin rekord të rasteve dhe vdekjeve nga virusi.
Organizata Botërore e Shëndetësisë (OBSH), e cila i ka dhënë asaj etiketën Delta, e ka kategorizuar atë si një variant shqetësimi (VOC). OBSH ka thënë se vazhdon të vëzhgojë “transmetueshmërinë e rritur ndjeshëm” dhe një “numër në rritje të vendeve që raportojnë përhapje të lidhura me këtë variant”.
