Bashkimi Europian i ka bërë thirrje të gjitha vendeve anëtare të ndërpresin fluturimet me vendet e Afrikës së Jugut, pas shfaqjes së variantit të ri të koronavirusit, i cilësuar nga ekspertët si “i frikshëm”.
Shumë pak dihet për variantin e ri të quajtur B.1.1.529, por shkencëtarët thonë se fakti që ka plot 32 lloje mutacionesh, e bën atë tepër “tmerrues”. Ky variant është identifikuar në Afrikën e Jugut, Botsëana dhe Hong Kong, ndërsa ditën e sotme u konfirmua rasti i parë në Belgjikë.
Shkencëtarët thanë se varianti i ri ka një numër jashtëzakonisht të lartë mutacionesh, me më shumë se 30 në proteinën kryesore, strukturën që përdor virusi për të hyrë në qelizat që sulmon.
Italia, Austria, Franca, Japonia, Hollanda, Malta dhe Britania e Madhe janë ndër vendet që kanë ndërprerë tashmë fluturimet me Afrikën e Jugut.
Kujtojmë që rasti i parë i variantit të ri të Covid, i identifikuar për herë të parë në Afrikën Jugore, është konfirmuar edhe në Belgjikë, me laboratorët në vend duke rritur vigjilencën e tyre për të kapur llojin potencialisht më të transmetueshëm.
Një pacient që kthehej nga Egjipti, nëpërmjet Turqisë, kontraktoi variantin, sipas Laboratorit Kombëtar të Referencës, i cili dërgoi një komunikim mbarëkombëtar për të rritur urgjencën për pasagjerët që mbërrinin nga Afrika e Jugut. Dy raste të tjera të mundshme u analizuan të premten, ku njëri u identifikua si një variant delta dhe tjetri lloji i ri B.1.1.529. Ky i fundit mendohet se mund të jetë rezistent edhe ndaj vaksinave.
