Prania e variantit Delta është konfirmuar tashmë në Shqipëri, ndërsa rastet me Covid janë rritur në një kohë që edhe virozat stinore janë të pranishmë.
Zëvendësministrja e Shëndetësisë, Eguena Tomini ka treguar në një intervistë për ABC News se në cilat raste duhet kërkuar ndihma e mjekut të të familjes, kur shenjat e një infeksioni viral të zakonshëm mund të ngatërrohen me simptomat e Deltës.
“Në rastin kur kemi shenjat klinike, rrufë, dhimbje kokë, grricje fyti, diarre, temperaturë. Ndërkohë këto janë disa shenja që e specifikojë si një infeksion viral të zakonshëm, nuk duhet që të nënvlerësohet asnjë rast por duhet të kërkohet ndihma e mjekut të familjes”, ka thënëTomini.
Më tej ajo ka bërë apel për vaksinim me dy doza dhe se pavarësisht se edhe në këtë rast virusi mund të infektojë, personat e vaksinuar e kalojnë më lehtë.
“Delta është një variant shumë i transmetueshëm që ka prekur dhe persona që janë të vaksinuar, por e kalojnë më lehtë. Jemi të rriskuar por vaksinimi vetëm pa zbatimin e masave nuk mund të kuptohet dhe në mënyrë të ndërsjelltë”, është shprehur Tomini.
Në vendin tonë u konfirmuan rastet e para me variantin e identifikuar së pari në Indi, Delta. Deri tani me dy doza janë vaksinuar rreth 500 mijë persona, ndërsa ditën e sotme janë raportuar 31 raste të reja infeksionesh.
