Kreu i Urgjencës Kombëtare, Skënder Brataj tha se shenjat kryesore të variantit Delta të Covid-19 mund të ngatërrohen edhe me ftohjen. Në një intervistë për mediat, Brataj tha se shpesh njerëzit mendojnë se ajri i kondicionuar shpesh jep shenja që janë tipike edhe për variantin Delta dhe një e tillë është edhe diarreja.
“Shenjat kryesore ngatërrohen më shumë me ftohjen, sidomos që tashmë njerëzit mendojnë se ajri i konndicionuar jep ato shenja që janë dhe tipike për variantin Delta. Një gjë tipike është edhe diarreja. Për fatin e mirë nuk ka forma të rënda”, tha Brataj.
Kreu i Urgjencës tha se shpejtësia e përhapjes së këtij varianti është shumë më e lartë krahasuar me variantet e tjera, duke e bërë edhe më të rrezikshëm. Ai nuk e mohoi prezencën e variantit në Shqipëri, pasi diçka të tillë e tregon edhe numri i rasteve të reja, që ditët e fundit ka ardhur në rritje.
“Shpejtësia e përhapjes së tij është më e madhe dhe ka një % shumë të lartë si virus krahasuar me variantet e tjera duke e bërë dhe më të rrezikshëm në përhapje. Mund të jetë prezent në Shqipëri këtë e tregon dhe numri i rasteve të reja në vendin tonë”, u shpreh Brataj.
