Komisioneri i BE Oliver Varhelyi ka takuar kryeministrin e Kosovës, Albin Kurtin ditën e sotme në Prishtinë. Gjatë takimit, Varhelyi është shprehur se për Ballkanin Perëndimor do të ketë më shumë vaksina, ndërsa me dërgesën që pritet të vijë në qershor, mund të vaksinohen punëtorët e shëndetësisë.
“Me këtë kontribut, sektori shëndetësor i Kosovës do të mund të vaksinohet me dërgesën e parë dhe me dërgesat që do të vijnë në qershor mund të vaksinoni punëtorët shëndetësorë. Ky është kontributi më i rëndësishëm që të ndihmojmë për fundin e pandemisë. Do të vazhdojmë të punojmë për të siguruar më shumë vaksina që të vaksinohen të gjithë. Ne e kemi shoqëruar Kosovën gjatë tërë pandemisë duke ofruar pajisje mjekësore. Tani po vijmë te vaksinat që mendojmë se është përpjekja e fundit për pandeminë, e dini që kjo për ne nënkupton se brengosemi për Ballkanin Perëndimor dhe për Kosovën”, tha r Varhelyi gjatë një konference të përbashkët me kryeministrin e Kosovës.
Ndërkohë, Kurti u shpreh se vaksinat e dërguara nga BE tregojnë përkrahjen që unioni ka për Kosovën. Ai tha se lufta kundër Covid-19 fitohet vetëm duke punuar së bashku.
“Kjo sasi e parë e kësaj pakoje të dërguar nga Bashkimi Evropian, përveç që është shpresëdhënëse, na bën që të kemi përkrahjen e BE për qytetarët tanë, kjo simbolikë me shumë vlerë na jep besimin se rrugëtimi ynë drejt BE-së është i mbushur me miq e që sot do të falënderoj Austrinë. Vetëm duke qenë së bashku do ta fitojmë luftën kundër Covid-it. Sot po e rifillojmë vaksinimin dhe të mos ndalemi që të arrijmë të vaksinojmë deri 60% të popullatës”, tha Kurti.
