Tensionet në Lindjen e Mesme janë përshkallëzuar ndjeshëm, pas një vale të re sulmesh ajrore të Izraelit ndaj objektivave ushtarake në Iran.
Mediat zyrtare të të dy vendeve raportojnë se një bazë ushtarake në Tabriz, në veriperëndim të Iranit, është goditur nga forcat izraelite, ndërsa qyteti jugor i Shirazit ka qenë gjithashtu në shënjestër të bombardimeve.
Këto sulme pasojnë operacionin masiv të koduar “Luani në ngritje”, i cili u ndërmor pak orë më parë dhe kishte në objektiv kryeqytetin Teheran, objektet bërthamore në Natanz dhe struktura të rëndësishme raketore iraniane.
Mediat iraniane raportojnë se në këtë ofensivë u vra komandanti i Gardës Revolucionare, Hossein Salami, si dhe gjashtë shkencëtarë të lartë të përfshirë në programin bërthamor.
Kryeministri izraelit Benjamin Netanyahu deklaroi se operacionet kanë për qëllim çmontimin e infrastrukturës bërthamore dhe të kapaciteteve balistike të Iranit.
Në reagim, Teherani ka paralajmëruar një “hakmarrje të ashpër” dhe ka nisur më shumë se 100 dronë drejt territorit izraelit.
Shtetet e Bashkuara janë distancuar nga sulmet izraelite, por njëkohësisht kanë paralajmëruar Iranin që të mos përfshijë bazat amerikane në ndonjë kundërpërgjigje.
