Ditën e nesërme do të nis procesi i vaksinimit për farmacistët në Tiranë. Lajmin e ka bërë të ditur “Urdhri i Farmacistëve” që shkruan se të gjithë ata që janë të interesuar të vaksinohen, duhet të plotësojnë formularin ku kërkohet emri, mbiemri, mosha, numri i telefonit dhe numri i identifikimit. Në njoftim thuhet se formularët do të dërgohen në qendrat e vaksinimit.
Njoftimi i plotë:
Të nderuar kolegë,
Ju njoftojmë se ditën e nesërme nis procesi i vaksinimit për farmacistët e Rajonit të Tiranës. Të gjithë farmacistët që janë të interesuar të vaksinohen, të plotësojnë formularin e mëposhtëm me të dhënat përkatëse, në mënyrë që të hartohen listat që do i dërgohen qëndrave të vaksinimit.
Në Shqipëri ka nisur procesi i vaksinimit për të moshuarit, personelin shëndetësor dhe mësuesit. Aktualisht në vend përdoren katër lloje vaksinash të cilat janë Pfizer, AstraZeneca, Sputnik V dhe vaksina kineze e Sinovac. Prej kësaj të fundit kanë mbërritur në vend 192 mijë dozat e para, ndërsa janë kontraktuar 1 milionë të tilla. Ndërkohë, ditën e djeshme kanë mbërritur gjithashtu dozat e para nga sasia prej 22 mijë e 230 vaksinash të Pfizer që pritet të vijnë në Shqipëri. Në vazhdim pritet të vijnë edhe doza të AstraZeneca, ndërsa Brenda datës 10 prill priten edhe 50 mijë doza të Sputnik V.
