Në Kosovë vijon vaksinimi i qytetarëve kundër koronavirusit, ku tani e kanë mundësinë e vaksinimit të gjithë ata persona që janë mbi 18 vjeç.
Nga të dhënat e fundit të Ministrisë së Shëndetësisë, të cilat janë përditësuar në 17 korrik, mësohet se numri i qytetarëve që kanë marrë dozën e parë të vaksinës është 220 mijë e 250 qytetarë, kurse dozën e dytë e kanë marrë 90 mijë e 165 qytetarë.
Gjithashtu Instituti Kombëtar i Shëndetit Publik në Kosovë (IKSHPK), nëpërmjet një postimi që ka bërë në faqen zyrtare në rrjetet sociale, iu ka bërë thirrje të gjithë qytetarëve që të marrin vaksinën kundë virusit të rrezikshëm, në mënyrë që të jenë të mbrojtur edhe nga variantet e reja.
Sjellim në vëmendje se në Kosovë janë duke u dhënë dy lloje të vaksinës kundër COVID-19, Pfizer dhe AstraZeneca.
Ndërsa së fundmi, Ministria e Shëndetësisë ka njoftuar qytetarët se kanë të drejtë të zgjedhin se cilin lloj të vaksinës duan të marrin, gjithashtu ka bërë të ditur se ka doza të mjaftueshme të të dyja llojeve të vaksinave. Kujtojmë gjithashtu se Kosova i lehtësoi masat anti-COVID javë më parë, ku me vendimin e Qeverisë janë lejuar festat familjare si dhe janë lejuar të punojnë lokalet e natës.
