Prej thuajse dy vitesh jemi të “pushtuar” nga pandemia që shkaktoi koronavirus. Në Shqipëri, rasti i parë pozitiv u konfirmua në mars të vitit 2020 dhe që nga ajo periudhë, paniku dhe frika te qytetarët ka ekzistuar çdo ditë.
Prodhimi i vaksinave u pa si zgjidhja e vetme për t’i shpëtuar kësaj fatkeqësie botërore dhe shumë të tilla u prodhuan muajt e fundit, si Pfizer, Johnson&Johnson, Sinovac etj.
Me krijimin e vaksinave dhe certifikimit nga EMA, nisi dhe vaksinimi masiv i popullatave. Në Shqipëri, vaksinimi masiv, ndoshta rastësisht, nisi pak ditë para zgjedhjeve. Kjo gjë, mund ta justifikojë faktin që jemi ndër vendet e fundit në rajon sa i përket të vaksinuarve.
Në renditjen e personave që kanë marrë 1 dozë vaksine, Shqipëria renditet e teta në 10 vendet e Ballkanit. Vetëm 17.1% e shqiptarëve kanë marrë një dozë vaksine, duke lënë pas vetëm Bullgarinë dhe Maqedoninë. Para nesh, qëndrojnë plot 7 vende: Serbia, Greqia, Sllovenia, Kroacia, Rumania, Mali i Zi dhe Turqia.
Edhe në renditjen e personave që kanë marrë dy vaksina, Shqipëria renditet në tri vendet e fundit, me 10.6% të vaksinuar. Kjo përqindje, është trefish më e vogël se e Serbisë që është në vend të parë, që ka vaksinuar plot 31.9% të popullsisë me të dyja dozat.
Arsyet pse jemi ndër vendet e fundit në rajon sa i takon të vaksinuarve, mbeten enigmë. Ndoshta mungojnë vaksinat, ndoshta njerëzit nuk preferojnë të vaksinohen. Por me ritmet aktuale, do të zbresim edhe në vendin e fundit, pasi Bullgaria dhe Maqedonia poshtë nesh, po rriten gradualisht në vaksinime.
