Deklarata e kryeministrit Edi Rama se do të vaksinohen në fillim të moshuarit që janë personalitete, ka ngjallur shumë debate dhe kundërshti nga figura të njohura. Për çështjen në fjalë ka reaguar edhe presidenti i vendit, Ilir Meta duke thënë se diçka e tillë është e papranueshme. I pyetur nga gazetarja Beti Njuma në studion e Ora News ai ka thënë se nuk duhen bërë diferencime klasore dhe se të gjithë qytetarët duhet të jenë të barabartë kur vjen puna te jeta dhe shëndeti. Meta ka thënë se janë disa kategori që janë më të rëndësishme si mjekët, personeli në spitale apo të moshuarit, por çdo diferencim tjetër për të është klasor.
Pjesë nga intervista:
“Nuk jemi në situatë për të bërë diferencime klasore, pasi askush nuk e ka këtë të drejtë. Të gjithë qytetarët janë të barabartë, sidomos kur bëhet fjalë për jetën dhe për shëndetin e tyre. Të gjithë duhet të trajtohen si të tillë. Natyrisht, janë disa fasha që janë më të rëndësishme, siç janë mjekët, sanitarët, personeli që ndeshet me këtë sfidë, mosha e tretë, që mund të rezultojë më problematike, invalidët apo persona të tjerë, por çdo diferencim tjetër pastaj ngjan si klasor.”
Rama deklaroi se do jenë të moshuarit që janë personalitete ata që do e marrin vaksinën me prioritet për të mos thënë më pas që nuk i kanë kujtuar. Kjo metodë përzgjedhëse jo vetëm që i ndan njerëzit sipas statusit social, por i heq atyre të drejtën për t’u vaksinuar. Natyrisht, me numrin e pakët të vaksinave që kanë ardhur në vendin tonë do të nis një luftë se kush do i marr i pari.
