Janë të shumtë shtetet që po presin me “gjak të ngrirë” nisjen e shpërndarjes së vaksinave kundër koronavirusit, në një kohë që shumë qeveri kanë dhënë dhe paratë e para “kapar” për të prenotuar sasitë e vaksinave që u duhen.
E gjithë kjo për të parandaluar përhapjen masive të COVID-19 dhe numrin e lartë të vdekjeve sidomos të moshat e vjetra.
Por në një kohë që “Moderna” ka njoftuar dje se ka zbuluar një vaksinë kundër koronavirusit dhe se është 94.5% efektive, Dr. Anthony Fauci, mjeku kryesor i sëmundjes infektive në SHBA, tha se, vaksinimet mund të fillojnë muajin tjetër.
“Moderna” planifikon të aplikojë për produktin e saj në Administratën Amerikane të Ushqimit dhe Barnave, për autorizimin e vaksinës, pasi të grumbullojë më shumë të dhëna sigurie më vonë këtë muaj, raporton CNN.
Fauci thotë se, pret që vaksinimet e para kundër COVID-19 të fillojnë “në pjesën e fundit të dhjetorit dhe jo në ditët e para të muajit të ardhshëm”.
Fillimisht, nuk do të ketë vaksinë të mjaftueshme për të gjithë. Grupet me përparësi më të lartë, që përfshijnë punonjës të kujdesit shëndetësor, të moshuar dhe njerëz me kushte themelore mjekësore, do të marrin vaksinën të parët.
“Unë mendoj se të gjithë të tjerët do të fillojnë të vaksinohen nga fundi i prillit”,- tha Fauci. “Dhe kjo do të ndodh në muajin maj, qershor, korrik. Do të duhen disa muaj për të bërë”,- pohoi ai.
Më herët, “Pfizer” dhe “BioNTecha” javën e kaluar, kanë raportuar se kanë zbuluar një vaksinë që është efektive po aq sa e Modernas.
/Burimi: CNN/ GazetaReforma.com/
