Ogerta Manastirliu, ministrja e Shëndetësisë dhe Mbrojtjes Sociale, ka bërë me dije se sot nis vaksinimi me dozat ruse të Sputnik V. Gjatë inspektimit të kushteve të ruajtjes së vaksinave në Institutin e Shëndetit Publik, Manastirliu shtoi se nga dita e diel, do të fillojë vaksinimi masiv i grupmoshave +70 vjeç.
“Sot fillojmë me vaksinimin me Sputnik V. Do te jenë 5 mijë të moshuar që do vaksinohen me SputnikV. Nga dita e dielë do të vijojmë vaksinimin masiv të grupmoshave +70 vjeç, duke organizuar gjithmonë punën me mjekët e familjes dhe qendrat shëndetësore kudo në vend. Ndërkohë që nga sot do të fillojë shpërndarja në të gjithë vendime vaksinave që kanë mbërritur”, tha Manastirliu.
Deri më tani në Shqipëri, janë vaksinuar afro 54 mijë qytetarë, ku është finalizuar imunizimi i bluzave të bardha dhe po vazhdon vaksinimi i të moshuarve, mësuesve dhe pedagogëve.
Vendi ynë po merr aktualisht sasi të vogla vaksine nga Pfizer, me të cilin marrëveshja është për 500 mijë doza. Dy ditë më parë, u morën edhe 10 mijë doza të vaksinës ruse Sputnik V. Ditën e djeshme, kanë mbërritur 192 mijë doza të tjera vaksine nga Kina dhe se është arritur një marrëveshje për një milion vaksina në tërësi. Sipas Manastirliut, do të vaksinohen 500 mijë qytetarë shqiptarë deri në qershor, ndërsa vaksinimi dhe imunizimi i plotë, do të bëhet brenda 14 muajve të ardhshëm.
