Anthony Fauci, i cili është doktori dhe këshilluesi i presidentit Joe Biden, ka thënë sot se sapo Shtetet e Bashkuara të Amerikës të japin miratimin e plotë për një apo më shumë vaksina kundër Covid 19, do të ketë një valë detyrimesh për të punësuarit në shumë sektorë të ndryshëm që të vaksinohen kundër virusit.
Sipas ekspertit të lartë amerikan, të gjitha kolegjet, shkollat, kompanitë private, grupet sipërmarrëse, spitalet e shumë institucione të tjera, do të kenë mundësi të bëjnë të detyrueshëm vaksinimin për nëpunësit e tyre.
Gjithashtu, Fauci u shpreh se ekziston mundësia që disa persona do të kenë nevojë edhe për një dozë përforcuese. Të parët që do të marrin dozën e tretë, do të jenë të moshuarit, si dhe kushdo që jeton pranë një fëmije do të duhet të jetë i vaksinuar, sidomos në shkolla.
Doktori këmbënguli se në muajin shtator, të gjithë fëmijët dhe të rinjtë duhet të rifillojnë normalisht shkollën duke qenë të pranishëm fizikisht. Por për këtë arsye, kushdo që do të jetë në kontakt me ta, duhet të mbajë maskë dhe të jetë i vaksinuar, për shkak të përhapjes së variantit Delta sidomos tek më të rinjtë!
Rikujtojmë se Shtetet e Bashkuara të Amerikës kanë shënuar më shumë se 36 milionë raste dhe më shumë se 600 mijë viktima që nga fillimi i pandemisë.
