Zv/ministrja e Shëndetësisë, Eugena Tomini ka folur për mundësinë e vaksinimin me pagesë nga privati.
E ftuar në në emisionin ‘’Real Story’’ në News24, Tomini thotë se momentalisht ka vështirësi në tregun farmaceutik, dhe kjo ka shkaktuar luftë tregtare e diferencime.
Sipas saj, procesi në fjalë kërkon kohë nga distributorët jo shtetërorë, por ajo siguron se qeveria ka për detyrë të realizojë vaksinim falas.
“Duke parë vështirësinë e tregut farmaceutik. Tregtia apo sundimi i tregut farmaceutik, ka bërë që të kemi diferenca. Luftë tregtare. Duke parë luftën që është bërë kaq e ashpër, që mund të kemi një mbiprodhim përkundrejt kërkesës, e shoh që arritja e një vaksinimi të popullatës është detyrë e qeverisë, përkundrejt falas. Duke parë që qeveritë kanë probleme, e shoh pak të vështirë. E kuptova logjikën. Duke qenë se si rregullator të tregut, ky proces kërkon kohë, nga distributorët jo shtetërore. Mendoj që në mendimin aktual, shënimi absolutisht që merret.”- tha Tomini.
Ajo u ndal dhe te shifrat e koronavirusit, ku ditët e fundit është vënë re një rënie e numrit të të infektuarve, por vijon të mbetet i lartë numri i viktimave.
“Kemi një rënie të qëndrueshme të shifrave prej disa ditësh. Kjo lidhet edhe me masat, që kanë dhënë efektin e tyre. Jemi ende herët për të diskutuar një nivel pragu përkundrejt të infektuarve. Vaksinimi që ne synojmë, do të ulë transmetueshmërinë. Niveli i rënieve të infektimit nuk ka lidhje me viktimat 24-orëshe, sepse tranziti i pacientit nuk reflekton 24 apo 48 orëshin, por kërkon një periudhë 2-3 javore. Në periudhën e shkurtit, ku qarkulluan mutacionet dhe kishim transmetueshmëri të lartë edhe te grupmoshat e reja, u reflektua fakti i numrit të lartë të fataliteteve”, u shpreh ajo.
