Mësohet se vaksina ruse Sputnik V, do të fillojë të prodhohet në Serbi. Lajmin e kanë bërë të ditur autoritetet shëndetësore në Rusi, të cilat lajmërojnë se prodhimet do të nisin në 20 maj. Fondi Rus i Investimeve, i cili ka mbështetur edhe financimin e vaksinës ka thënë se: “Serbia është bërë vendi i parë në Evropën Jugore që prodhon Sputnik V”.
Sipas Fondit Rus, vaksina mund të eksportohet në vendet e tjera në rajon në një fazë të mëvonshme.
Presidenti serb Aleksandar Vuçiç pritet të vizitojë sot Institutin Torlak të Beogradit, ku do të prodhohet vaksina. Deri më sot vaksina ruse prodhohet vetëm në Rusi dhe Bjellorusi dhe e kanë aplikuar disa vende, mes tyre edhe Shqipëria.
Kujtojmë se disa ditë më parë edhe Këshilli i Ministrave, ka dekretuar vendimin për marrjen e vaksinës ruse Sputnik V. Vlen të thuhet se njësoj si me marrëveshjet për vaksinat kineze Sinovac dhe amerikano-gjermanen Pfizer, edhe kjo për vaksinën ruse është nënshkruar nën kushtet e “sekretit tregtar”. Kështu të dhëna të detajuara për sasinë, çmimin, koston dhe afatet e dërgesave “nuk do të publikohen” në asnjë website zyrtar. Praktika e tillë për vaksinat është kërkuar rëndomtë pothuajse në të gjitha vendet nga kompanitë farmaceutike. Kujtojmë se më parë Shqipërisë i është dhuruar një sasi vaksinash ruse Sputnik V.
