Ministrja e Arsimit Rinisë dhe Sporteve, Evis Kushi teksa ka vizituar nga afër ambientet e një shkolle që po bëhet gati për të nisur mësimin konsultues më datë 1 shtator, iu ka bërë apel mësuesve që të vaksinohen brenda afatit që është përcaktuar. Ajo teksa ka theksuar se pjesa më e madhe e mësuesve në të gjithë vendin janë vaksinuar ka shpërndarë edhe statistika të të prekurve me COVID të cilët marrin trajtime spitalore. Kushi nënvizoi se 95% e atyre që janë në gjendje të rëndë janë të pavaksinuar.
“I kemi vënë një rëndësi të jashtëzakonshme vaksinimit të arsimtarëve dhe studentëve. Jam e kënaqur që një pjesë e madhe janë vaksinuar. Sot që flasim 95% e atyre që janë në gjendje të rëndë janë të pavaksinuar. Ta shfrytëzojmë shtatorin për t’u vaksinuar.
Ju e keni marrë njoftimin që viti i ri shkollor vazhdon në datë 27. Arsyeja lidhet me mësimin plotësues. Do kërkoja që me përkushtimin maksimal që ju karakterizon, ta bëjmë si duhet mësimi plotësues dhe paralelisht t’i krijojmë kushte me aktivitete sipas udhëzimeve që janë shpërndarë”, u shpreh Kushi.
Ndër të tjera Kushi ka theksuar se një nga objektivët e këtij mandati të tretë të socialistëve është që të mos kemi më mësim me dy turne në shkollat e vendit tonë.
“E kemi vendosur objektiv që brenda këtij mandati 4-vjeçar të mos kemi asnjë shkollë me dy turne”, shtoi ajo.
