Shqipëria do të blejë vaksina anti-Covid-19 nga kompani COVAX, sapo ajo të jetë gati. Marrëveshja e miratuar nga Qeveria është dorëzuar për ratifikim në Kuvend. Shuma totale që do të parapaguhet është 3 990 000 (tre milionë e nëntëqind e nëntëdhjetë mijë) dollarë amerikanë. Kjo shumë do të paguhet nga buxheti i alokuar për Ministrinë e Shëndetësisë dhe Mbrojtjes Sociale dhe Fondi i Sigurimit të Detyrueshëm të Kujdesit Shëndetësor.
Kush do të vaksinohet?
Ndërkaq, bazuar në vendimin e Komiteti Kombëtar të Imunizimit, është vendosur që të merren vaksina për 20 përqind të popullsisë. Sasia që mund të ofrohet nga COVAX Facility për të mbuluar 20% të popullsisë, sipas Komitetit do të jetë me dy doza vaksinë, është një sasi e konsiderueshme, e përafërt me sasinë që synohet edhe për vaksinimin ndaj gripit sezonal 2020-2021.
Është e paqartë se kush do të vaksinohet, sepse nuk ka vaksina për të gjithë. Kryeministri Rama është shprehur se “Kemi bërë rezervim për vaksinën kur do të dalë. Pa llogaritur kompetentët e FB, që flasin për çhipa, që do ju përgjojnë ku do shkojnë, çfarë do bëjnë, që janë fantazi e çmendur.”
Ministria e Shëndetësisë ka thënë se kjo vaksinë do të jetë për të gjithë. Komiteti i Imunizimit i referohet vaksinës së gripit të stinës, kur llogarit 20 përqindëshin. Por në faqen ueb të Institutit të Shëndetit Publik shkruhet: “Vaksina ndaj gripit rekomandohet të kryhet: çdo vit, për çdo individ 6 muajsh e lart, dhe në veçanti për grupet e riskut: Gratë shtatzëna, të moshuarit mbi 60 vjeç, të sëmurët me sëmundje kronike, fëmijët e vegjël, personeli shëndetësor.
Nuk kuptohet se nga e ka nxjerrë 20 përqindëshin Komiteti, por duket se sasia e limituar e vaksinave (kur ajo të jetë gati), do të krijojë probleme në shpërndarjen e saj. Nuk është e qartë nëse vaksina do të jetë falas për popullsinë apo me pagesë dhe sa do të jetë kjo vlerë.
Marrëveshja
Sipas kësaj marrëveshje, Këshilli i Ministrave, me qëllim mbrojtjen e popullsisë nga infeksioni i shkaktuar nga COVID-19, miratoi në parim marrëveshjen e angazhimit, me Aleancën GAVI, për pjesëmarrjen në strukturën globale të qasjes në vaksinat COVID-19 (COVAX Facility)”.
COVAX u lançua në prill 2020 nga Organizata Botërore e Shëndetësisë (OBSH), Komisioni Evropian dhe Franca, për t’iu përgjigjur sfidave të krijuara nga pandemia e shkaktuar nga COVID-19, si bashkim i qeverive, organizatave shëndetësore (të nivelit global), prodhuesve, shkencëtarëve, sektorit privat, shoqërisë civile, me synimin për të siguruar një qasje inovative dhe të barabartë në diagnostikimet, trajtimet dhe vaksinat COVID-19.
Për Shqipërinë, kjo alternativë është më fleksibël dhe nuk ka kosto shtesë për shtetin shqiptar (kostoja finale është e njëjtë). Qëllimi i COVAX-it është përveçse prokurimi i një vaksine të sigurt kundër COVID-19 edhe sigurimi i kësaj vaksine te të gjitha shtetet, pavarësisht ekonomisë së tyre.
/Iconsyle.al/
