Gjatë kohëve të fundit, shumë kompani farmaceutike botërore, kanë deklaruar se janë pranë zbulimit të vaksinës finale anti-covid.
Ndërkohë institutet shëndetësore kanë nisur që të përgatisin skenarë për të bërë të mundur vaksinimin e popullatës dhe e njëjta gjë po ndodh edhe në Shqipëri.
Një lëvizje të tillë e ka pohuar edhe përgjegjësja dhe koordinatorja e programit të vaksinimit anti-covid në ISHP, biologia Erida Nelaj.
Gjatë një intervistë për emisionin “Real Story”, Nelaj foli rreth planit të qeverisë shqiptare për pajisjen me vaksinën kundër koronavirusit dhe se po vlerësohet çdo mundësi.
Biologia Nelaj, deklaroi se për një vaksinë të tillë si ajo e ‘Modernas’, Shqipëria i ka mundësitë e vaksinimit që kërkon temperaturë në minus 20-25 gradë celsius. Sa i përket vaksinës së Pfizer që kërkon temperaturë minus 70-80 gradë tha se asnjë vend nuk është i përgatitur por se po shqyrtohet çdo mundësi.
Nelaj tha se qeveria shqiptare ka marrëveshje me kompaninë COVAX dhe theksoi se në çdo rast vaksina kundër Covid-19 do të jetë falas.
“Vaksina është shumë e rëndësishme. Vaksinimi ka parandaluar sëmundje të tjera. Përveç Pfizer dhe Moderna ka dhe vaksina të tjera të aprovuara në disa vende për përdorim të shpejtë”, ka deklaruar biologia.
“Nuk duhet të mbetemi vetëm tek Pfizer, por janë dhe prodhues të tjerë. Janë 9 vaksina pothuajse në fazën e tretë. Ne i kemi filluar vlerësimet. Kemi një komitet ekspertësh që mbulojnë shumë mirë fushën e vaksinimit, që i vijnë në ndihmë programit.
Vaksinat e zakonshme, kemi dy lloje, kemi vaksina që kërkojnë kushte +2, +8. Dhe për vaksina në kushte plus 2 dhe plus 8 jemi të përgatitur ndërsa për vaksina që kërkojnë kushte -70 askush nuk është i përgatitur.
Gjithsesi ne po i vlerësojmë të gjitha, si mund ta realizojmë ruajtjen në -70. Për vaksina në minus 25 ne jemi të përgatitur si për poliomielitin, i kemi kushtet”, ka shtuar biologia./GazetaReforma.com/
