Ditën e sotme, vajzat e ekipit të Vllaznisë kanë kaluar në turin e dytë të UEFA Women’s Champions League, pasi ka mundur me penallti turqit e ALG Spor Kulubu. Koha e rregullt përfundoi me shifrat 3-3, me Bajraktarin që realizoi në minutën e fundit të shtesës dhe i dha mundësinë vajzave kuqeblu të provonin fatin nga gjuajtjet e penalltive.
Një lajm i tillë duket se ka gëzuar jashtë mase dhe presidentin e Federatës Shqiptare të Futbollit, Armando Duka. Me anë të një postimi në Facebook Duka thotë se kjo ishte një fitore e merituar për ekipin e vajzave të Vllaznisë, por njëkohësisht edhe për rritjen e futbollit të femrave në Shqipëri:
“Jashtëzakonisht i lumtur me fitoren e sotme të Vllaznisë në turin e parë kualifikues të UEFA Women’s Champions League ndaj kampiones së Turqisë, ALG Spor Kulubu!
Ka qenë një ndeshje vërtetë emocionuese dhe e luftuar deri në fund. Një arritje e shkëlqyer për vajzat kuqeblu, por edhe për futbollin e femrave. Le të shpresojmë që ky sukses të pasohet nga të tjera triumfe dhe Vllaznia të avancojë në fazën e grupeve të Champions League për femra.
Do të ishte një sukses i merituar për këtë ekip, por që njëkohësisht tregon se futbolli i femrave në Shqipëri është rritur në aspektin cilësor vitet e fundit. Urimet më të mira për drejtuesit e klubit, stafin teknik dhe shpresoj që Vllaznia të vazhdojë të jetë një burim frymëzimi për të gjitha vajzat që duan të luajnë futboll! Jemi krenar për ju”.
