Kreu i Partisë Demokratike, Lulzim Basha ndodhet ditën e sotme në qytetin e Fierit, ku është pritur me entuzizëm nga mbështetësit. Kryedemokrati ka mbajtur një fjalim të shkurtër para qytetarëve, duke iu bërë thirrje në radhë të parë që të mbajnë maskën dhe të respektojnë distancën.
“Të mbajmë maskat, të mbajmë distancën, por ama ta çojmë edhe më larg frymën e shpresës. Bashkë do fitojmë, bashkë Shqipëria do fitojë, Fieri do fitojë”, tha Basha mbi një makinë.
Më pas Basha ka vizituar një bar-kafe, ku premtoi se Partia Demokratike do ti çliroj nga çdo stres që kanë përjetuar përgjatë këtyre 8 viteve.
“Plani ynë do bëjë të mundur stabilizimin e gjendjes që të mos detyroheni të mbyllni qepenat. Një ditë pozitive bashkimi më 25 prilli. Do ju çlirojmë nga çdo stres dhe çdo problem i këtyre 8 viteve. Të gjithë bëhemi bashkë më 25, ta çlirojmë vendin nga e keqja dhe të sjellim pozitivitet”, tha Basha.
Ndërkohë që në rrugë i ka dalë përpara dhe një vajzë e re, e cila tha se ishte e zhgënjyer nga PS dhe kryeministri Edi Rama. “Jam një ish-socialiste e zhgënjyer. Nga këta manipulatorë. Nga një kryeministër që ka 8 vite dhe thotë kjo ishte gjysma e rrugës sonë. Jam Kamela Troka”, tha vajza. Kryedemokrati Lulzim Basha premtoi se do punojë për të gjithë, edhe për socialistët.
