Kryetari i Grupit Parlamentar të Partisë Socialiste, Taulant Balla, ka vazhduar takimet e tij elektorale në qytetin e Përrenjasit. Balla iu ka bërë thirrje të gjithë demokratëve që të bashkohen me Partinë Socialiste, “për të ardhmen e Shqipërisë”, ndërsa ka folur edhe për kandidaten për deputet në këtë zonë, Albana Hana, e bija e prokurorit të ndjerë, Xhevat Hana. Balla e ka përshkruar vajzën e prokurorit si “amanetin” e të atit dhe se duhet ta votojnë të gjithë ata që duan drejtësinë.
“Ne e dimë fare mirë se shembulli i djalit të Rrajcës, Xhevap Hanës, është shembulli i një prokurori që luftoi deri në fund të jetës së tij për të bërë drejtësi për krimet monstruoze të Sali Berishës dhe është nder për mua që në ekipin që unë drejtoj të jetë vajza e një prokurori që ishte shembulli i vetëm i vetmuar i këtyre 30 viteve në përpjekjet për të bërë drejtësi. Vajza e tij është pjesë i ekipit për të çuar përpara amanetin e Xhevap Hanës, për të çuar amanetin e gjithë atyre që duan që në këtë vend të ketë drejtësi”, tha Balla.
Balla nga Përrenjasi ka thumbuar opozitën dhe presidentin e vendit, Ilir Metën. Ai është shprehur se nuk “duhet çuar asnjë votë në partinë e Ilirit dhe Monikës”.
“Janë aty për të prishur prapë punë. Fati i madh i shqiptarëve është që tashmë të dy janë bashkë, Iliri dhe Saliu, ndaj ne duhet që kësaj radhe mos lejojmë asnjë votë te vetme të shkojë te partia e Ilirit dhe Monikës, iu bëj thirrje demokratëve të Përrenjasit, vota e tyre con ujë te mulliri i Ilirit. Demokratë, sot më shumë se kurrë ne duhet të bashkohemi për të ardhmen e Përrenjasit për të ardhmen e shqiptarëve”.,- ka thënë kreu i Grupit Parlamentar Socialist.
Ai gjithashtu në mbyllje të fjalës së tij i ka bërë thirrje të gjithë qytetarëve të krahinës që ti lënë mënjanë ndasitë dhe të mblidhen bashke për të ardhmen e vendit.
“I bëj thirrje kësaj krahine me kaq shumë patriotizëm, lërini mënjane ndasitë e vjetra, këtu nuk bëhet fjalë për kryetarin e komunës e bashkisë por për të ardhmen e vendit, larg qoftë mos bëhemi bashkë ne në 25 prill e ata të rikthehen përsëri, do vijnë ata që sa herë kanë ardhur kanë shkatërruar, gjithçka kemi arritur”., ka përfunduar fjalën e tij Balla.
