Fëmijët e parë që lindën në minutat e para të vitit të Ri 2022, ishin Akid dhe Aiden.
Nuk kanë munguar urimet nga zyrtarët, ndëkohë mes tyre ështe edhe ai i kryeministrit Edi Rama.
“Jetë të gjatë e paçi këmbën e mbarë Akid dhe Aiden”, shkruan Rama. Akid dhe Aiden janë dy djemtë të parë të lindur në vitin 2022. Një prej tyre ka lindur fiks në orën 00:00 në maternitetin “Mbretëresha Geraldinë”.
Ndërsa foshnja e dytë, lindi në maternitetin “Koço Gliozheni”, vetëm 1 minutë pas ndërrimit të viteve.
Kujtojmë që 2022 ka trokitur edhe në Shqipëri, që për një natë i është gëzuar jo vetëm festës, por edhe heqjes së orës policore për shkak të pandemisë. Qindra qytetarë kanë pritur Vitin e Ri në sheshin “Skënderbej” duke shijuar koncertin dhe spektaklin e fishekzjarrëve.
Qielli i kryeqytetit është mbuluar nga dritat e fishekzjarrëve, sapo akrepat kanë shënuar ndërrimin e viteve.
Nisur nga situata pandemike në vend, Komiteti Teknik i Ekspertëve vendosi të heqë orën policore dhe qytetarët kanë qëndruar dhe pas orës 23:00 jashtë shtëpive, për të pritur Vitin e Ri, duke rikujtuar dhe njëherë festën përpara pandemisë.
Ndërkohë Policia e Shtetit prej disa ditësh në gatishmëri, ka vijuar detyrën e saj, duke patrulluar në rrugët e kryeqytetit dhe vendit për mbarëvajtjen e rendit dhe sigurisë në vend.