14 ditë heshtje nga AKU ndërsa bebet ushqehen me arsenik. Një muaj indiferencë ndërsa spinaqi me kadmium shitet në treg. 1,358 kg mish me salmonelë në pjatat tona. Kjo nuk është më neglizhencë – është krim i organizuar kundër shëndetit publik.
Por si u kthye AKU në varrmihësin e shëndetit tonë? Me një agronom për një milion banorë në Tiranë. Me 64% e stafit pa asnjë kualifikim profesional. Me juristë që “kontrollojnë” mishin, me zero përgjegjësi, zero transparencë!
Ky improvizim institucional ka prodhuar një zinxhir të tërë skandalesh alarmante. 13.2 ton akullore të kontaminuara me oksid etileni, një substancë kancerogjene, u shpërndanë në 15 qytete pa asnjë paralajmërim.
Qumësht dhe dhallë e prishur nga “Lufra” mbërritën në tavolinat tona. Minjtë u filmuan mbi thasët e miellit të “Diamond”, ndërsa AKU qëndronte në heshtje totale.
Rasti i KFC-së është simbol i këtij dështimi sistematik. Nga 1,535 kg mish i infektuar me salmonelë, vetëm 177 kg u ndaluan. Pjesa tjetër? U servirën në pjata, u konsumuan nga familjet tona. AKU vazhdon t’i shmanget çdo përgjegjësie, duke mos iu përgjigjur kërkesave të vazhdueshme për informacion nga Gazeta Reforma, si përmes emaileve ashtu edhe përmes pyetjeve publike.
“Coca-Cola” zhduku 1.8 milion litra pije të skaduara pa asnjë mbikëqyrje, duke shkelur çdo procedurë ligjore. Agjencia e Mjedisit thotë se nuk ka asnjë dokument për këtë proces. AKU? As që e pa të nevojshme të japë shpjegime.
Ndërsa BE ka sistem alarmi në sekondë, ne kemi një institucion që pret dy javë për të ndaluar helmin në ushqimin e bebeve. Vendi është kthyer në koshin e plehrave të Europës – çdo produkt i ndaluar gjen strehë këtu.
Ndoshta kur të jetë tepër vonë, kur efektet e arsenikut të shfaqen te bebet tona, kur kanceri nga oksidi etileni të ketë prekur mijëra familje, atëherë do të kujtohemi se heshtja e AKU-së sot po na kushton jetën nesër.
/gazetareforma.com
