Vaksina për gripin nuk ka në treg, raporton Urdhri i Farmacistëve, i cili ia raportoi këtë situatë edhe kryetarit të opozitës, Lulzim Basha, gjatë një takimi. Ajo i qëndron deklaratës se janë importuar vetëm 9500 copë vaksina, ndërsa Agjencia e Kontrollit të Barnave këmbëngul se janë 34 mijë e 500 vaksina antigrip.
“Në lidhje me çështjen e vaksinave të gripit, Urdhri i qëndron deklaratës së bërë se vetëm 9500 vaksina janë pajisur me autorizim për tregun e hapur.
Të pavërteta janë shifrat që Agjencia deklaron, jo vetëm se në të njëjtën deklaratë një herë thonë që deri tani janë importuar 34500 dhe një herë thonë që në shtator janë importuar 70000 vaksina, por se e vërteta është se në treg vaksina nuk ka. Nëse ka, Agjencia të na tregoje ne dhe popullatës se ku janë”, deklaron Urdhri i Farmacive.
Ndërsa Agjencia e Kontrollit të Barnave servir një shifër tjetër.
“Sa i përket tregut të hapur farmaceutik, pranë Agjencisë Kombëtare te Barnave dhe Pajisjeve Mjekësore deri më tani janë importuar rreth 34.500 mijë vaksina antigrip, nga disa subjekte te ndryshme tregtare dhe shifra e përmendur sot është importuar nga vetëm njeri prej tyre”.
Në fakt, në treg është e vështirë të gjesh këto vaksina kundër gripit të stinës.
/GazetaReforma.com/
