Janë zbardhur të tjera detaje në lidhje me aksidentin e rëndë që ndodhi paraditen e sotme tek Tajvani në qendër të Tiranës. Mësohet se në aksident janë përfshirë 8 automjete dhe dyshohet se shkaktar ka qenë autobusi i Unazës. Shefi i qarkullit të Tiranës Taulant Muka ka bërë me dije se janë 6 persona të plagosur. Ai u shpreh se po kontrollohen shoferët për nivelin e alkoolit.
“Ka dyshime për shpejtësi por s’mund të japim verdikt final”, tha Muka.
Kurse një nga shoferët e përfshirë në aksident, tha se autobusi ishte me shpejtësi të madhe. Shoferi drejtonte mjetin Benz që shihet në pamje para autobusit urban. Nga disa pamje në rrjet, duket se shoferi i autobusit nuk ka pranuar të dalë nga mjeti pas aksidentit të rëndë.
“Dola mora pak veten, se nuk e kuptova çfarë ndodhi, vetëm mbaja këmbën në frena. Me sa pashë në autobus kishte shumë të plagosur. Shoferi i autobusit ishte shumë i tronditur, tek të 60-at ishte, e pashë që ishte i shokuar, a ishte me alkool, a me tension, a me zemër, ta shohim”, tha ai.
Aktualisht 3 persona kanë përfunduar në spitalin e Traumës, por pritet që numri të shtohet, ndërsa disa të tjerë kanë marrë ndihmën e parë mjekësore në vendin e ngjarjes dhe më pas janë larguar në banesat e tyre.
