Disa degë të mësuesisë janë mbyllur për shkak se nuk ka pasur regjistrime në Universitetin e Vlorës. Njoftimin e jep rektori Roland Zisi. “Degët Kimi, Fizike, Matematike, Gjuha italiane janë mbyllur për shkak te mungesës se regjistrimeve”, shpjegon rektori. Ka rënë gjithashtu numri i studentëve tek Gjuha angleze, Gjuha shqipe, në degët e mësuesisë.
Mbyllja e degëve në Universitetin e Vlorës është pasoje e notës mesatare të diferencuar. Konferenca e Rektorëve i ka kërkuar Ministrisë së Arsimit të heqë notën mesatare 7.5 për pranimet në ciklin Bachelor.
“Arsyeja kryesore është nota mesatare e diferencuar. Nota mesatare 7.5 nuk i lejon studentet të regjistrohen në vit të parë. Para disa ditësh u mblodh Konferenca e Rektorëve, ku merrnin pjesë drejtuesit e të gjitha universiteteve publike, në mënyrë unanime u vendos që ti kërkohet Ministrisë së Arsimit të rishikojë vendimin për pranimet në universitete. Në mënyrë që nota mesatare të mos jetë më kriter për studimet Bachelor por vetëm për në nivelin Master”, deklaron Zisi.
Degët e preferuara në Universitetin e Vlorës mbeten Infermieria, Drejtësia dhe Ekonomiku.
/GazetaReforma.com/
