Unaza e Re e Tiranës është një kantier i hapur që më shumë se sa asfalt dhe beton, do të gëlltisë para nga ato të taksapaguesve kryeqytetas, ndërsa kaosi nuk do të eliminohet.
E pra, kush mendonte se fatura 20 miliardë lekë për rehabilitimin e aksit rrugor “Pallati me Shigjeta- Rreth rrotullimi ‘Shqiponja’”, ishte jashtëzakonisht e fryrë, nuk ka parë gjë akoma…
Kryetari i Bashkisë së Tiranës, nëpërmjet strukturave në varësi të tij, i ka shtuar kësaj shifre të mbifryrë edhe një faturë tjetër, me mbi 2 miliardë lekë (të vjetra), të cilat do të paguhen ekskluzivisht nga taksat e banorëve të kryeqytetit, raporton sot “Boldneës.al”.
Tenderi
Ujësjellës-Kanalizime Tiranë (UKT) ka shpallur së fundi tenderin për “Spostim rrjet ujësjellësi dhe kanalizime në funksion të objektit: “Rehabilitimi i segmentit rrugor mbikalimi pallati me shigjeta rreth-rrotullimi ‘Shqiponja’, Loti”.
Fondi limit për tenderin është parashikuar në vlerën e 238 milionë lekëve të reja (pa TVSH) dhe procedura pritet të mbyllet në 8 Tetor 2020.
Në dokumentet e tenderit, sqarohet se projekti për spostimin e rrjetit të Ujësjellësit dhe kanalizimeve, është hartuar në bazë të një kërkese të Autoritetit Rrugor Shqiptar, të datës 21 Prill 2020.
Pikërisht, kjo kërkesë e Autoritetit Rrugor Shqiptar, ngre dyshime të forta për mënyrën se si është hartuar projekti i rehabilitimit të aksit rrugor të Unazës së Re në kryeqytet dhe mungesa, në dukje, e koordinimit ndërmjet institucioneve qendrore dhe vendore.
Projekti super i shtrenjtë
Projekti për rehabilitimin e aksit “Pallati me Shigjeta – Rreth rrotullimi ‘Shqiponja’” u zgjat të paktën dy vjet, nën protestat e banorëve të “Astir-it” dhe skandalit me kompaninë mashtruese “DH-Albania”.
Kryetari i Bashkisë së Tiranës, Erion Veliaj, mori një rol protagonisti në betejën kundër protestuesve, duke i fyer e ironizuar, si edhe duke mbrojtur projektin me faturë marramendëse të zgjerimit të Lotit të Parë të Unazës së Re të kryeqytetit.
Por, duket se, përtej betejës me qytetarët e zonës, Autoriteti Rrugor Shqiptar, nën varësinë e Ministrisë së Infrastrukturës, si edhe Bashkia e Tiranës, kanë harruar edhe “diçka të vogël”, spostimin e rrjetit ekzistues të ujësjellës-kanalizimeve.
Projekti për ndërtimit/rehabilitimin, sidomos akseve kryesore, si rregull përfshin jo vetëm asfaltimin, por edhe sistemin e kanalizimeve, ndriçimin dhe të gjithë përbërësit e tjerë të rrugës. Të gjitha këto parashikime vendosen në preventivin e punimeve.
Por, në rastin konkret, duket se të gjithë institucionet e përfshira, e kanë lënë pas dore çështjen e kanalizimeve.
Dhe, për këtë arsye, ndërkohë që rehabilitimi i rrugës po vijon me ritme shumë të ngadalta, Bashkia e Tiranës ka vendosur që t’i shtojë edhe një tjetër faturë shtesë prej mbi 2 miliardë, faturës fillestare shumë të kripur së rrugës.
Kjo gjë jo vetëm që rrit kostot, por ndikon edhe në vonesat e mëtejshme të përfundimit të projektit, me kosto të larta për qytetarët, jo vetëm buxhetore, por edhe në kohën e shpenzuar pa fund në trafikun e rënduar të atij aksi, si dhe në shtimin e ndotjes që rrjedhimisht prodhon edhe më shumë sëmundje në Tiranë.
/Burimi: Boldneës.al/ Përshtati: GazetaReforma.com/
