Ultimatumit të pedagogëve tashmë i ka kaluar afati dhe ata janë zyrtarisht në grevë. Bëhet fjalë për pedagogët e Fakultetit të Shkencave të cilët kanë bërë me dije një javë më parë, se nëse nuk plotësohet kërkesat e tyre, kryesorja nëse qeveria nuk shfuqizonte Ligjin e Arsimit të Lartë, atëherë ata do të futeshin në grevë dhe kjo ka ndodhur.
Përmes një vendimi të siguruar nga “BalkanWeb” ata shprehen të indinjuar nga mungesa e përgjigjes së Ministrisë së Arsimit për kërkesat e tyre, ndaj edhe kanë ndërmarrë hapin e paralajmëruar tashmë.
greva është me afat të pacaktuar, deri në momentin që qeveria ta shikojë të nevojshme dhe të veprojë ndaj veprimeve që ka ndërmarrë.
Mes pikave të vendimit, iu bëhet gjithashtu thirrje të gjithë asambleve të të gjitha fakulteteve të UT që të mblidhen për të koordinuar veprimet, ndërsa thirren gjithashtu asambletë e fakulteteve në të gjithë Shqipërinë që t’i bashkohen grevës.
Ndërkohë ditën e hënë datë 4 Shkurt 2018, ora 11.00 është thirrur të mblidhe Asambleja e fakulteteve të Universitetit të Tiranës.
NJOFTIMI I PLOTË
Ditën e sotme ka pasur një sërë zhvillimesh në lidhje me kauzën universitare. Në orën 09.00 pati një takim tonin me Znj. Besa Shahini, Ministre e Arsimit, Sportit dhe Rinisë, ndërsa në orën 11.00 është zhvilluar mbledhja e Senatit të Universitetit të Tiranës. Më vonë Znj. Shahini doli në konferencë për shtyp. Dhe në orën 14.00 u mblodh Asambleja e Personelit Akademik të Fakultetit të Shkencave Sociale.
Në takimin me Ministren, grupi i pedagogëve paraqiti argumente të thelluara për kërkesat e paraqitura nga Takimi i Asambleve të fakulteteve të UT. Ndryshe nga sa pritej, si hap logjik i kërkesave të paraqitura prej takimit të Asambleve të Fakulteteve të Universitetit të Tiranës datës 25 janar 2019, Znj. Shahini nuk ktheu asnjë përgjigje konkrete për realizimin e këtyre kërkesave. Qëndrimi i saj ishte që brenda “Paktit për Universitetin” marrin zgjidhje të gjitha problematikat e arsimit të lartë.
Sa më sipër znj. Shahini i konfirmoi edhe në konferencën për shtyp.
Senati i UT vendosi për të kundërshtuar VKM-të e nxjerra nga qeveria dhe MASR, si akte nënligjore në kundërshtim me Kushtetutën e RSH dhe vetë ligjin “Për Arsimin e Lartë në RSH”
Asambleja e FSHS, me kuorum dhe shumicë votash, vendosi për shpalljen e grevës pa afat.
Në këto kushte, grupi i autorizuar nga Takimi i Asambleve të fakulteteve të Universitetit të Tiranës, reagon si më poshtë:
Thërret Takimin e Asambleve të fakulteteve të Universitetit të Tiranës ditën e Hënë, datë 4 Shkurt 2018, ora 11.00, Godina Liria, në koherencë me vendimin e marrë në takimin e datës 25 Janar 2019, për t’u rimbledhur pas përgjigjes nga Ministria e Arsimit, Sportit dhe Rinisë.
