Në komunikimin e tij në rrjetet sociale, kryeministri i vendit Edi Rama lajmëroi se nga 11 maji do zgjerohet harta e zonave të gjelbërta, por përjashtoi Tiranën për momentin.
“Ka disa zona të tjëra që mendojmë se i plotësojnë kriteret. Tirana në këtë moment mbetet zonë delikate dhe për këtë arsye nuk përfshihet. Deri ditën e premte do të kemi një konkluzion dhe do të lajmërojmë për zona të tjera të gjelbërta. Dëgjoj vërejtet e disave dhe më duket sikur nuk jetojnë në këtë planet. Deri pas kësaj jave dhe javën në vijim ne do të bëjmë një analizë të thellë, do ballafaqohemi edhe me komitetin për hapjen e mëtejshme të koridoreve tokësore dhe ajrore. Në 11 maj do kemi lehtësim në raport me domosdoshmërinë e karantinimit në hotel. Në javën e ardhshme do shikojmë të gjithë elementët”,- shtoi ai.
Po ashtu, kryeministri foli edhe rreth deklaratës së ish-ministrit Ilir Beqja mbi uljen e pensioneve dhe rrogave për përballimin e epidemisë, duke u shprehur se diçka e tillë nuk do ndodhë.
Ai tha se as Beqja nuk e kishte propozuar diçka të tillë dhe se deklarata e tij ishte përdorur nga opozita për të hedhur akuza mbi qeverinë.
“Nuk ka ulje pensionesh dhe ulje rrogash, se dikush ka një ide dhe mund ti thotë në një vend ku të gjithë mund të shprehin idetë e tyre. Të gjithë mund të thonë ide të caktuara, për sa i përket vendimi zyrtar të qeverisë nuk ka pasur dhe nuk do të ketë prekje të pensioneve apo të pagave. Përkundrazi nëse do të preken do të preken vetëm për t’u rritur dhe asnjëherë për t’u ulur për asnjë arsye në botë.”, tha Rama.
E teksa dje u dha vendimi i Ministrisë së Arsimit lidhur me përfundimin e vitit shkollor, për universitetet Shahini nuk komunikoi asnjë vendim, ndërsa sot kreu i qeverisë bëri me dije se nesër do jepet vendimi përfundimtar dhe se sot ka zhvilluar një mbledhje me minister Shahini e Manastirliu dhe me rektorët përkatës.
“Sot kam pasur një mbledhje të fundit me ministren e Shëndetësisë, të Arsimit dhe rektorët se çdo të vendoset në lidhje me universitetet. Nesër do bëhet njoftim se çdo të bëhet me universitetet”, tha Rama.
https://www.facebook.com/edirama.al/videos/1776439749159732/
